მესტიის მუნიციპალიტეტის მულახის თემის სოფელ ჭოლაშში, ი. გაბლიანის სახელობის მულახის სპორტულ კომპლექსში, მესტიის მოკრივეთა ნაკრები  გუნდის 10 დღიანი ჯგუფური წვრთნა ხორციელდება.

საწვრთნელ სწავლებას კრივში მესტიის მუნიციპალიტეტის ნაკრები გუნდის უფროსი მწვრთნელი, გია წერედიანი, ლერი ნაკანი, ზურაბ ფალიანი, ზურიკო თამლიანი და სოსო იოსელიანი ხელმძღვანელობენ.

სასწავლო-საწვრთნელ ვარჯიშებში  მესტიის ნაკრები გუნდის 12 სპორტსმენი იღებს მონაწილეობას. შეკრების მიზანია, სპორტსმენების შედეგების და მიღწევების  გაზრდა, ასევე სპორტული ოსტატობის ამაღლება. 

მოგეხსენებათ, რომ ილიკო გაბლიანის სახელობის სპორტ-სკოლის (სათემო ცენტრის) რეკონსტრუქცია  2017 წელს დასრულდა. ამ ეტაპზე სპორტულ ცენტრში ყველანაირი პირობაა შექმნილი, რომ უმაღლესი დონის  და სტანდარტების საწვრთნელ შეკრებებს და საერთაშორისო ტურნირებს უმასპინძლოს.

სპორტულ კომპლექსში არის სპორტული დარბაზი, ხელოვნური კედელი სწრაფ ცოცვაში,  ფეხბურთის მოედანი, ასევე  გარე საცურაო აუზი. მანსარდის სართულზე მოწყობილია  ჰოსტელი, საშხაპეები, საუნა, სამზარეულო და კაფე–ბარი, რაც ქმნის ყველანაირ პირობას ჯგუფური საწვრთნელო-სასწავლო შეკრებებისა და სხვადასხვა ტურნირების ჩატარებისთვის. 

სპორტულ ცენტრში შესაძლებელია ასევე სათანადო საწვრთნელი ვარჯიშებისა და სპორტული შეჯიბრების ჩატარება სპორტის სხვადასხვა სახეობებში, როგორიცაა ჭიდაობა, ალპინიზმი, კლდეზე ცოცვა, კრივი და სხვა.

საწვრთნელი ვარჯიშები "მესტიის მუნიციპალიტეტის სპორტული ცენტრი“-ს ორგანიზებით ტარდება.